Струшките села Поум и Џепин без ниту едно прваче

Основните училишта во струшките села Поум и Џепин новата учебна година ја почнаа без ниту едно прваче. Бројот на првачиња оваа година во Струга и струшко е дури за 77 помал во однос на ланската година. Раководителот на училиштето во селото Корошишта, Зини Јусуфи, вели дека состојбата е повеќе од катастрофална и очекува дека ситуацијата ќе биде уште полоша наредните години.

„Овој тренд ќе продолжи и понатаму. Наредната година ќе биде уште полошо, ќе биде уште подрастична ситуацијата, односно ќе биде сè помал и помал бројот на ученици. Тоа ќе значи дека голем број наставници ќе останат на улица. Кога ќе нема ученици, наставниците ќе нема кому да му предаваат“, изјави Зини Јусуфи-наставник.

Во училиштето во селото Корошишта, бројот на првачиња е седум, а лани биле 12. Во централното училиште во Делогожда има само 8 првачиња, а лани нивниот број бил 19, додека во селото Ливада од ланските 18, годинава има само две првачиња.

Од Алијанса на Албанците во Струга денеска обвинија дека образованието во Струга, како и многу други работи биле заложници на погрешните и незаконски постапки на градоначалникот Рамиз Мерко. Тој изминативе години незаконски назначуваше и разрешуваше директори низ многу училишта. Тоа го потврдија и Државниот просветен инспекторат и Антикорупциската комисија. Но, засега ниту една институција не презеде мерки против него.

„Но, погрешното не завршува тука само во именување и разрешување на директори преку социјалните мрежи на Фејсбук. За жал образованието во Струга е претворено во канцеларија за вработување и лекување на комплексите на „Бермудскиот триаголник“ – Општина – Универзитет – Министер. Тие без почитување на ниту еден професионален или законски критериум ги вработуваат во струшките училишта дипломираните на нивниот познат Универзитет, кој е веќе познат по производството на дипломи без знаење“, нагласи Љуљзим Насуфи-претседател на АА Струга.

Од Алијанса бараат итно стопирање на процесот на политизација на училиштата кои и онака се соочуваат со многу проблеми како сè помалиот број ученици. Бараат министерот за образование, Јетон Шаќири, да ѝ ги одземе ингеренциите на Општина Струга во областа на основното образование. Алсат побара став од локалната власт за да прашаме за состојбите во образованието, но одговор не добивме.